ថ្ងៃ20ខែមិថុនា ឆ្នាំ2016ការធ្វើលំហាត់ប្រាណនាំមកនូវអត្ថប្រយោជន៍ជាច្រើនសម្រាប់មនុស្សគ្រប់វ័យ មិនថាក្មេង ឬចាស់។ វាក៏ល្អសម្រាប់ស្ត្រីមានផ្ទៃពោះដែរ ព្រោះវាជួយទប់ស្កាត់ការធ្លាក់ទឹកចិត្តនៅក្រោយពេលឆ្លងទន្លេ និងការកើនកម្រិតជាតិស្កខ្ពស់អំឡុងពេលមានផ្ទៃពោះ ហើយវារក្សាសម្ពាធឈាមរបស់អ្នកឱ្យស្ថិតក្នុងកម្រិតសមស្រប។ ក្រៅពីនេះ ការឈឺ និងការចុកចាប់ទាំងអស់ដែលជារឿងធម្មតានៃការមានផ្ទៃពោះ អាចនឹងបានធូរស្រាល តាមរយៈការធ្វើលំហាត់ប្រាណទៀងទាត់។

នេះគឺជាបញ្ជីនៃលំហាត់ប្រាណដែលមានសុវត្ថិភាពសម្រាប់ស្ត្រីមានផ្ទៃពោះ៖

• • យូហ្គា-លំហាត់ប្រាណដែលធ្វើចលនាស្រាលៗ និងមិនហួសប្រមាណ យូហ្គាមិនប៉ះពាល់ដល់សុខភាពរបស់ស្ត្រីមានផ្ទៃពោះទេ។ ការសិក្សាមួយដែលបោះពុម្ភផ្សាយនៅក្នុង ព្រឹត្តិប័ត្រគព្ភបរិហារវិទ្យា និងរោគរបស់ស្ដ្រី បានរកឃើញថា វើយូហ្គាជាលំហាត់ប្រាណដែលមានសុវត្ថិភាពសម្រាប់ស្ត្រីមានផ្ទៃពោះ។ យូហ្គាជួយបង្កើនភាពបទបែនដើម្បីបង្កាភាពងាយរងរបួស។ វាក៏ជួយធ្វើឱ្យរាងកាយរបស់អ្នករឹងមាំ និងធ្វើឱ្យខួរក្បាលភ្លឺថ្លា និងបង្កើនស្មារតីដែលជាផលប្រយោជន៍សម្រាប់ស្ត្រីមានផ្ទៃពោះ។ ទោះបីជាយ៉ាងណាក៏ដោយ កាយវិការលំហាត់ប្រាណមួយចំនួនដែលតម្រូវឱ្យអ្នកដាក់ក្បាលចុះក្រោម ឬប្រើដៃលើកទម្ងន់ខ្លួនរបស់អ្នក ពិតជាមិនមែនជាកាយវិការល្អសម្រាប់ស្រ្តីមានផ្ទៃពោះនោះទេ។ ជាការល្អ នៅពេលមានផ្ទៃពោះ អ្នកគួរធ្វើយូហ្គាតាមការណែនាំរបស់អ្នកឯកទេសយូហ្គា។
  • លំហាត់ប្រាណច្រត់កែងដៃ និងចុងជើងទប់លំនឹងខ្លួន(Plank) –លំហាត់ប្រាណច្រត់កែងដៃ និងចុងជើងទប់លំនឹងខ្លួនក៏ជាលំហាត់ប្រាណល្អសម្រាប់ស្ត្រីមានផ្ទៃពោះដែ ព្រោះវាជួយធ្វើឱ្យរាងកាយផ្នែកខាងលើ ព្រមទាំងជើងរបស់អ្នករឹងមាំ ហើយវាក៏ជួយដល់រាងកាយឱ្យត្រៀមសម្រាប់ពេលសម្រាលកូន។ ដើម្បីធ្វើលំហាត់ប្រាណច្រត់កែងដៃ និងចុងជើងទប់លំនឹងខ្លួន នេះបាន អ្នកត្រូវដាក់កែងដៃនៅលើឥដ្ឋក្រោមស្មារបស់អ្នក និងព្យាយាមរក្សាលំនឹងខ្លួនឱ្យត្រង់។ អ្នកក៏អាចព្យាយាមធ្វើចលនានៅលើដៃរបស់អ្នក និងបន្តស្ថិតនៅក្នុងជំហរអាវ៉ង់។ ត្រូវដាក់ឆ្អឹងខ្នងរបស់អ្នកឱ្យត្រង់ជានិច្ច ដើម្បីកុំឱ្យពោះរបស់អ្នកធ្លាក់។
  • លំហាត់ប្រាណលើកទម្ងន់-ការអាវ៉ង់ ការលើកដុំដែក ការងើបចុះឡើងដោយអង្គុយចោងហោង និងការហាត់ប្រាណលើកទម្ងន់ជាមូលដ្ឋានផ្សេងៗទៀតមិនមានគ្រោះថ្នាក់អ្វីទេ។ តាមពិត វាមានប្រយោជន៍សម្រាប់ស្ត្រីមានផ្ទៃពោះ ព្រោះការធ្វើលំហាត់ប្រាណទាំងនេះអាចជួយស្ត្រីឱ្យសម្រកទម្ងន់ក្រោយឆ្លងទន្លេបានងាយស្រួល។ ទោះជាយ៉ាងណាក៏ដោយ ប្រសិនបើអ្នកកំពុងព្យាយាមលំហាត់ប្រាណលើកទម្ងន់ វាជាការល្អបំផុតក្នុងការលើកទម្ងន់ត្រឹម ២០ ផោន ឬតិចជាងនេះ ព្រោះបើអ្នកមិនធ្លាប់ធ្វើលំហាត់ប្រាណនេះពីមុនមកទេ វាអាចធ្វើឱ្យអ្នកមានរបួស។ ទោះបីយើងដឹងថា ការហាត់ប្រាណមានអត្ថប្រយោជន៍ជាច្រើន ហើយរបៀបរស់នៅដែលមិនបានធ្វើលំហាត់ប្រាណទៀងទាត់ផ្តល់ផលប៉ះពាល់អវិជ្ជមានដល់ស្ត្រីមានផ្ទៃពោះ និងកូនដែលមិនទាន់កើតរបស់ពួកគេក៏ដោយ មានលំហាត់ប្រាណមួយចំនួនដែលស្រ្តីមានផ្ទៃពោះគួរតែចៀសវាង។ នេះគឺជាបញ្ជីនៃលំហាត់ប្រាណដែលស្ត្រីមានផ្ទៃពោះគួរតែជៀសវាង៖

• • ការធ្វើលំហាត់ប្រាណគេងផ្ងារធ្វើចលនាក្បាលពោះ(Supine Exercises) –នៅពេលដែលអ្នកឈានដល់ត្រីមាសទី ២ និងទី ៣ អ្នកនឹងមិនអាចគេងផ្កាប់មុខបានទៀតទេ។ ទោះជាយ៉ាងណាក៏ដោយ អ្នកគួរបញ្ឈប់ការគេងផ្ងារ ព្រោះទម្ងន់ពីពោះរបស់អ្នកអាចសង្កត់ផ្នែកណាមួយនៃរាង្គការយ ឬរាំងស្ទះដល់លំហូរឈាមរបស់អ្នក ឬលំហូរឈាមទៅកូនក្នុងផ្ទៃរបស់អ្នក។ ដូច្នេះ គូរជៀសវាងការធ្វើលំហាត់ប្រាណណាដែលតម្រូវឱ្យអ្នកគេងផ្ងារ។ ផ្ទុយទៅវិញ ចូរជ្រើសរើសការធ្វើលំហាត់ប្រាណដោយអង្គុយ និងឈរ ព្រោះវាធ្វើឱ្យអ្នកហាត់ប្រាណបានល្អ ដោយមិនធ្វើហួសប្រមាណ។

• • សកម្មភាពធាក់ឡើង(Bouncing Activities) –នៅពេលមានផ្ទៃពោះ សន្លាក់របស់អ្នកអាចនឹងរលុង។ ដូច្នេះការធ្វើសកម្មភាពដែលមានចនលាធាក់ឡើង ឬមានរំញ័រផ្សេងៗទៀតអាចមានគ្រោះថ្នាក់ខ្ពស់។ ដូច្នេះ ជាការល្អបំផុតត្រូវចៀសវាងសកម្មភាពដូចជាប្រដាល់ លោតអន្ទាក់ រាំហ្សាមបា និងលំហាត់ប្រាណអ៊ែរ៉ូប៊ីក។

• កីឡាដែលប៉ះទង្គិចរាងកាយ-ប្រភេទកីឡាណាមួយដែលមានការប៉ះទង្គិចរាងកាយខ្លាំងគួរត្រូវបានជៀសវាង នៅពេលដែលអ្នកឆ្លងផុតត្រីមាសទីមួយហើយ។ លទ្ធភាពនៃការប៉ះទង្គិចលើពោះ ឬខ្នងរបស់អ្នកមានខ្ពស់ណាស់ ហើយវាអាចធ្វើឱ្យអ្នក និងទារករងគ្រោះថ្នាក់។ ដូច្នេះ ជៀសវាងការលេងកីឡា ដូចជាកីឡាបាល់បោះ កីឡាបាល់ទាត់ និងកីឡាបាល់ឱប នៅពេលមានផ្ទៃពោះ។
  ត្រូវចងចាំការណែនាំទាំងនេះថា ការធ្វើលំហាត់ប្រាណនឹងផ្តល់ឱ្យអ្នកនូវអត្ថប្រយោជន៍ជាច្រើនដែលនឹងជួយអ្នកឱ្យមានរាងកាយសមរម្យ និងសុខភាពល្អ ក្នុងអំឡុងពេល និងក្រោយពេលមានផ្ទៃពោះ។”